नेपाल इन्जिनियरिङ कलेज दुवाकोट चाँंगुनारायण भक्तपुरले वार्षिक झण्डै १० करोडको छात्रबृति प्रदान गर्दै आएको जनाएको छ । कलेजले बिहीबार राजधानीमा पत्रकार सम्मेलन गरी सालाखाला प्रति विद्यार्थी १० लाखको दरले झण्डै एक सय विद्यार्थीलाई छात्रबृति वितरण गर्दै आएको जनाएको हो ।
पत्रकार सम्मेलनमा भक्तपुरको चाँंगुनारायण नगरपालिकाका प्रमुख एवं कलेज सञ्चालक समितिका अध्यक्ष जीवन खत्रीले आफनै पैसाबाट इन्जिनियरिङ पढ्न नसक्ने विविध थरीका विद्यार्थीलाई कलेजले वार्षिक छात्रबृति प्रदान गर्दै आएको जानकारी गराए । कलेजका प्राचार्य सहप्राध्यापक दुर्गाप्रसाद भण्डारी विभिन्न ८ शीर्षकहरुमा विद्यार्थीलाई छात्रबृति प्रदान गर्दै आएको जनाए ।
कलेजमा स्नातक तहका विभिन्न क्षेत्र गरी कुल वार्षिक चार सय ८० जनाको कोटा रहेको छ । कलेज पोखरा विश्वविद्यालयको सम्वन्धनमा सञ्चालित छ । नाफा नलिने उद्देश्यका साथ सामाजिक संस्थाको रुपमा कलेज सञ्चालित छ ।
